هُــمّـــا

كنت عند الدكتور أشرف زكي الباطنة ... لما تطرق الحوار لمشكلة رئيسية .. وغلط كبير كلنا بنقع فيه
وأعتقد إنكم كمان هتوافقوني الرأي فيه ..
كان الدكتور أشرف بيقول : تسأل الطلبة انتو ما بتذاكروش ليه ؟؟ يقولوا : هما !!! ما بيشرحوش
وتسأل الدكاترة : انتو ما تشرحوش ليه ؟؟ يقولوا : هما ما بيفهوش وما بيحضروش ؟؟
وتسأل الطلبة انتو ما بتحضروش ليه ؟؟ أصل هما ما بيفهموناش ؟؟ وليه ما بتهموهمش يا دكاترة ؟؟ أصل هما ما بيدولناش فلوس ؟؟
وانتو ياللي فوق ما بتوهمش فلوس ليه ؟؟
يردوا يقولوا : هما ما بيشرحوش !!

وهكذا ....

فكرني دا برضه بالدكتور أحمد خالد توفيق في "قصاصات قابلة للحرق " لما كان بيقول :
(مصر غارقة في دوامة: كيف أعمل وأنت لا تعطيني مالاً ؟.. كيف أعطيك مالاً وأنت لا تعمل ؟ )

دي المشكلة اللي شايف إنها عويصة شوية .. شويتين كمان

القضية مش قضية التعليم والتدريس بحد ذاتها ... لكن مشكلة إننا بنرمي همومنا على غيرنا
ومعظمنا بيطلع المشاعر السلبية اللي جواه بالكلام والشكوى ..
وبقى دا هوه محور أحاديثنا " هما "

وأحب أفكركم بكلمة للرائع أ.فريد البيدق

" النقاش الموضوعي لا يخرج عن دائرة الموضوع إلى الشخص بأية نسبة "

طبعا لا أعفي أحد ... لكن كل واحد يشتغل في مكانه أعتقد حالنا هايبقى أحسن كتيييييييييير