خايف
أنا عبارة عن كائن حي تسيطر عليه مجموعة من المخاوف سواءً كانت وهمية أو حقيقية .. وباحاول جاهدا إني أتغلب على واحدة ورا التانية .. لكن للأسف اللي مخليني لغاية دلوقتي ما خلصتش مخاوفي .. إني ما بصلحش أصل الخوف لكن باصلح النتائج .... !!!
خايف: من يووووم القيااااامة والوقفة قدام ربنا سبحانه وتعالى ! وهوه وحده سبحانه عارف عني كل حاجة ! ويسألني عن كل كبيرة وصغيرة ؟؟
خايف: أقابل الرسول صلى الله عليه وسلم يوم القياااامة يقولي سحقا سحقا .. بعدا بُعدا !
خايف: أفلس يوم القيامة ! أكون من اللي جم بأعمال .. لكن عليا ديون لخلق كتيـــر يخلصولي حسناتي .. ويحطولي سيئات كمان ع اللي عندي ... واتحدف ف النار !
خايف: تخلص حياتي وأنا ماليش وزن في الحياة .. وما ضفتلهاش أي حاجة.
خايف: ما ابقاش دكتور كويس ومتميز في مجالي !
خايف: ناس تفهمني غلط .. وأنا في مرحلة من مراحل تطور شخصيتي.
خايف: ناس تظن بيه ظن مش كويس.
خايف: من إني ألاقي الشخصية المناسبة إنها تبقى مراتي لكن يكون ناقصها حاجات أساسية !
خايف: الحب ييجي للإنسانة غير المناسبة.
خايف: تبقى حياتي مجرد كلام ع النت ، ومايبقاش ليه وزن ف الواقع.
خايف: أفضل طول حياتي ليه هوايات كتيـــرة !! وأنا مش محترف أي حاجة فيهم !
خايف: حياتي تنتهي لما أموت !!
خايف: إني أتحط في موقف يهمّ الإسلام .. واخذل الإسلام !
خايف: من إني باخد حاجات كتير في حياتي ببساطة .. وباعامل الناس ببساطة ، وناس تفهمني غلط !
خايف: رمضان يعدي عليا وأنا خسران !
خايف: القرآن ييجي يشتكيني عند ربنا ويقوله بعد ما حفظني ضيعني !!!
خايف: أكون دعيت حد لضلالة، وآخد سيئاته.
خايف: أجرح حد بكلمة أو بفعل يأثر عليه في حياته وأكون أنا السبب.
خايف: أموت على معصية !!!!
خايف: عدم نجاحي أو تصرفاتي تكون فتنة للكفار ، وتخليهم يكرهوا الدين !
خايفين من إيه انتو كمان ؟؟
